ក្រសួងទេសចរណ៍បង្ហាញពីវិធានការការពារកូវីដ១៩ ជូនដល់ភ្ញៀវទេសចរ ដែលធ្វើដំណើរកំសាន្ដតាមរមណីយដ្ឋាន

(ភ្នំពេញ)៖ ក្រសួងទេសចរណ៍ បានផលិតវីដេអូខ្លីមួយ ដែលមានរយៈពេលជាង២នាទី បង្ហាញពីវិធានការការពារកូវីដ១៩ ជូនដល់ភ្ញៀវទេសចរ ដែលធ្វើដំណើរកំសាន្ដតាមរមណីយដ្ឋាន និងគោលដៅទេសចរណ៍នានា នៅក្នុងប្រទេសកម្ពុជា។

ខាងក្រោមនេះ ជាវីដេអូរបស់ក្រសួងទេសចរណ៍៖

(សូមអានបន្ត)

ជប៉ុន បន្តផ្តល់ការគាំទ្រការងារបោសសម្អាតមីន និងសំណល់ជាតិផ្ទុះពីសង្រ្គាមនៅកម្ពុជា

(ភ្នំពេញ)៖ លោក Mikami Masahiro ឯកអគ្គរាជទូតជប៉ុនប្រចាំកម្ពុជា បានបង្ហាញពីគោលជំហររបស់រដ្ឋាភិបាលជប៉ុន និងប្រជាជនជប៉ុន នៅតែបន្ដគាំទ្រការងារ បោសសម្អាតមីន និងសំណល់ជាតិផ្ទុះពីសង្គ្រាម នៅកម្ពុជាឲ្យកាន់តែខ្លាំងខ្លាបន្ថែមទៀត ទាំងថវិកា សម្ភារ និងបច្ចេកទេស ដើម្បីធ្វើយ៉ាងណាឲ្យការងារនេះសម្រេចបានផែនការកំណត់។

ក្នុងឱកាសជួបសំណេះសំណាល និងជូនពរក្នុងឱកាសខួបកំណើតរបស់លោកឯកអគ្គរាជទូតជប៉ុន នៅថ្ងៃទី១០ ខែកក្កដា ឆ្នាំ២០២០នេះ ក្នុងនាមរាជរដ្ឋាភិបាលកម្ពុជា ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានសម្តែងអំណរគុណជូនចំពោះ រាជរដ្ឋាភិបាល និងប្រជាជនជប៉ុន តាមរយៈលោក Mikami Masahiro សម្រាប់ការចូលរួមចំណែក និងការគាំទ្រដល់ការងារ អភិវឌ្ឍន៍នៅកម្ពុជា ក្នុងនោះក៏មានការចូលរួមក្នុងវិស័យបោសសម្អាតមីនផងដែរ។

លោកទេសរដ្ឋមន្រ្តី បានបញ្ជាក់ថា ទំនាក់ទំនងរវាងកម្ពុជា និងជប៉ុន មានចំណងមិត្តភាព កិច្ចសហប្រតិបត្តិការ និងភាពជាដៃគូ ជាប្រពៃណី និងយូរអង្វែង។ លោកថា កម្ពុជា និងជប៉ុន រួមទាំងប្រទេសជាមិត្តដទៃទៀត នឹងសម្លឹងរួមគ្នាឆ្ពោះទៅរកកិច្ចសហប្រតិបត្តិការកាន់តែជិតស្និទ្ធ ដើម្បីសម្រេចបំណងឆ្ពោះទៅរកកម្ពុជាគ្មានមីនឆ្នាំ២០២៥៕

(សូមអានបន្ត)

រដ្ឋមន្ត្រីក្រសួងយុត្តិធម៌ ដឹកនាំដុតបំផ្លាញគ្រឿងញៀននៅខេត្តបាត់ដំបងជិត ២០គីឡូក្រាម និងថ្នាំមេតំហ្វេតាមីន (WY) ជាង៦ម៉ឺនគ្រាប់

(បាត់ដំបង)៖ នៅថ្ងៃទី១០ ខែកក្កដា ឆ្នាំ២០២០នេះ លោក កើត រិទ្ធ រដ្ឋមន្ត្រីក្រសួងយុត្តិធម៌ និងជាអនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានអញ្ជើញដឹកនាំដុតបំផ្លាញគ្រឿងញៀន ដែលត្រូវបានរឹបអូសតាមសេចក្តីសម្រេចរបស់សាលាដំបូងខេត្តបាត់ដំបង កំពង់ឆ្នាំង ពោធិ៍សាត់ និងប៉ៃលិន។

ពិធីនេះក៏មានការអញ្ជើញចូលរួមពីថ្នាក់ដឹកនាំរបស់ក្រសួងយុត្តិធម៌ នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន នាយឧត្តមសេនីយ៍ ម៉ក់ ជីតូ តំណាងអគ្គស្នងការដ្ឋាននគរបាលជាតិ តំណាងរដ្ឋបាលខេត្តបាត់ដំបង ខេត្តកំពង់ឆ្នាំង ពោធិ៍សាត់ និងប៉ៃលិន រួមជាមួយនិងប្រធានសាលាដំបូង ព្រះរាជអាជ្ញាអមសាលាដំបូងខេត្តបាត់ដំបង ខេត្តកំពង់ឆ្នាំង ខេត្តពោធិ៍សាត់ និងប៉ៃលិន មន្ត្រីរាជការ កងកម្លាំងប្រដាប់អាវុធ យុវជនកាយរិទ្ធ ស.ស.យ.ក និងប្រជាពលរដ្ឋជាង៥៥០នាក់។

(សូមអានបន្ត)

ជំនួបរវាងរដ្ឋមន្ត្រីក្រសួងមុខងារសាធារណៈជាមួយឯកអគ្គរដ្ឋទូតអូស្ត្រាលីប្រចាំកម្ពុជារួមចំណែកពង្រឹងទំនាក់ទំនងទ្វេភាគីរវាងរដ្ឋាភិបាលនៃប្រទេសទាំងពីរ

(ភ្នំពេញ)៖ ក្នុងឱកាសជួបពិភាក្សាការងារជាមួយ លោក Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា នារសៀលថ្ងៃទី១០ ខែកក្កដា ឆ្នាំ២០២០ នៅទីស្តីការក្រសួង លោក ព្រុំ សុខា រដ្ឋមន្ត្រី ក្រសួងមុខងារសាធារណៈ បានថ្លែងអំណរគុណក្នុងនាមរាជរដ្ឋាភិបាលកម្ពុជាជូនចំពោះរដ្ឋាភិបាល អូស្ត្រាលីដែលបានបន្តគាំទ្រប្រជាជនកម្ពុជាក្នុងការថែរក្សាសន្តិភាពនិងការអភិវឌ្ឍប្រទេសជាតិ។

ក្នុងឱកាសនោះដែរ លោកឯកអគ្គរដ្ឋទូតអូស្ត្រាលីប្រចាំកម្ពុជា ក៏បានលើកឡើងពីសារប្រយោជន៍នៃកិច្ចសហប្រតិបត្តិការបន្តទៀតរវាងភាគីទាំងពីរទៅលើវិស័យសាធារណៈដែលបម្រើឱ្យកម្មវិធីសំខាន់ៗនាពេលបច្ចុប្បន្នរបស់រាជរដ្ឋាភិបាលជាអាទិ៍៖ កំណែទម្រង់វិមជ្ឈការ ភាពដឹកនាំរបស់ស្ត្រី និងគណនេយ្យភាពសង្គម។ល។

ជាការឆ្លើយតប លោករដ្ឋមន្ត្រីក្រសួងមុខងារសាធារណៈក៏បានសម្តែងនូវការគាំទ្រ ចំពោះការប្តេជ្ញាចិត្ត របស់រដ្ឋាភិបាល អូស្ត្រាលីក្នុងកិច្ចសហប្រតិបត្តិការជួយផ្នែកសាធារណៈរបស់កម្ពុជាបន្តទៀតលើវិស័យសុខភាពសាធារណៈពិសេសជំនួយផ្នែកសុខាភិបាលសម្រាប់ការប្រយុទ្ធប្រឆាំងជំងឺកូវីដ១៩ វិស័យអប់រំ បណ្តុះបណ្តាលធនធានមនុស្ស វិស័យអភិវឌ្ឍជនបទនិងសង្គមកិច្ច ដែលរួមចំណែកជួយដល់ដំណើរការនៃការកំណត់អត្តសញ្ញាណកម្មគ្រួសារក្រីក្រងាយរងគ្រោះដោយវិបត្តិកូវីដ១៩។ល។

ជាចុងក្រោយនៃជំនួបនេះ ភាគីទាំងពីរបានឯកភាពគ្នាក្នុងការពិនិត្យលទ្ធភាពជម្រុញកិច្ចសហការលើវិស័យសាធារណៈបន្តទៀតដើម្បីរួមចំណែកដល់ការពង្រឹងទំនាក់ទំនងនិងកិច្ចសហប្រតិបត្តិការដែលមានប្រយោជន៍ទាំងសងខាងសម្រាប់រដ្ឋាភិបាលនិងប្រជាជននៃប្រទេសទាំងពីរកម្ពុជា អូស្ត្រាលី៕

(សូមអានបន្ត)

ជនជាតិអូស្រ្តាលីមួយរូបទៀតហើយទទួលបានយុត្តិធម៌ពី សម្តេចតេជោ ហ៊ុន សែន

(ភ្នំពេញ)៖ រឿងរ៉ាវក្តីក្តាំគ្នារវាងលោក ខាំបែល ភីថឺ ម៉ាក (Cambell Peter Mark) និងមិត្តស្រីឈ្មោះ ត្រា ចាន់ស្រីលីន រហូតរាលដាលដល់ប្តឹងមេធាវីមួយរូបផងនោះ ត្រូវបានបញ្ចប់ជាស្ថាពរហើយតាមការដោះស្រាយឈរលើគោលការណ៍ឈ្នះឈ្នះរបស់ សម្តេចតេជោ ហ៊ុន សែន ក្រោមការសម្របសម្រួលផ្សះផ្សាប្រកបដោយភាពប៉ិនប្រសព្វរបស់ លោក ដួង តារា ជំនួយការផ្ទាល់សម្តេចតេជោនាយករដ្ឋមន្ត្រី កាលពីថ្ងៃទី ៩ កក្កដា ២០២០កន្លងមកនេះ។

(សូមអានបន្ត)

ចង់សាកប្រើគ្រឿងញៀន សូម្បីកន្លះដង! ការបង្ក្រាបគ្រឿងញៀនទូទាំងប្រទេស សម្រាប់ថ្ងៃទី០៩ ខែកក្កដា៖ បង្ក្រាប៣៦ករណី ឃាត់ខ្លួន៤៥នាក់

(ភ្នំពេញ)៖ យុទ្ធនាការប្រយុទ្ធប្រឆាំងគ្រឿងញៀនខុសច្បាប់ទូទាំងប្រទេស សម្រាប់ថ្ងៃទី០៩ ខែកក្កដាឆ្នាំ២០២០នេះ បានបង្ហាញថា កម្លាំងសមត្ថកិច្ចបានបង្ក្រាប៣៦ករណី ក្នុងនោះករណីប្រើប្រាស់១៥ករណី និងជួញដូរ២១ករណី ដោយឃាត់ខ្លួនជនសង្ស័យ៤៥នាក់។

របាយការណ៍បានឲ្យដឹងថា លទ្ធផលអនុវត្តច្បាប់ពីថ្ងៃទី០១ ខែមករា ដល់ថ្ងៃទី០៩ ខែកក្កដា ឆ្នាំ២០២០នេះ កម្លាំងសមត្ថកិច្ច បានបង្ក្រាបចំនួន៥,៦៧១ករណី ឃាត់មនុស្ស១១,២៦៧នាក់ (ស្រី៧០៤នាក់)៕

(សូមអានបន្ត)

ឆ្លើយតបតាមការសន្យាលោក គង់ សោភ័ណ្ឌ អភិបាលខេត្តកណ្តាល បានប្រគល់ម៉ូតូចំនួន១០គ្រឿង ជូនដល់កងការពារព្រំដែនលេខ៦០១ យោធភូមិភាគពិសេស នាថ្ងៃទី៩ ខែកក្កដា ឆ្នាំ២០២០នេះ នៅសាលប្រជុំសាលាខេត្តកណ្តាល

(កណ្ដាល)៖ សូមជម្រាបថា ក្នុងពិធីអញ្ជើញចុះសំណេះសំណាលសួរសុខទុក្ខ និងចងសម្ព័ន្ធមេត្រីភាពរវាងសាលាខេត្តកណ្តាល ជាមួយកងការពារព្រំដែនលេខ៦០១ កាលពីថ្ងៃទី២៤ ខែមិថុនា ឆ្នាំ២០២០ នៅទីបញ្ជាការកងការពារព្រំដែនលេខ៦០១ នៅភូមិព្រែកហម ឃុំឈើខ្មៅ ស្រុកកោះធំ ខេត្តកណ្តាល កន្លងទៅថ្មីៗនេះ លោកអភិបាលខេត្ត បានឆ្លើយតបចំពោះសំណូមពររបស់កងការពាររួមមាន៖រក្សាសម្ព័ន្ធមេត្រីភាពរវាងកងការពារព្រំដែនលេខ៦០១ យោធភូមិភាគពិសេសជាមួយសាលាខេត្តកណ្ដាល ចំនួន២ដង ក្នុង១ឆ្នាំ គឺរៀងរាល់៦ខែម្ដងជួយធ្វើរបងព័ទ្ធជុំវិញទីបញ្ជាការកងការពារព្រំដែន៦០១ ប្រវែង៣០៤ម៉ែត្រ កម្ពស់២,៥ម៉ែត្រ។

ដើម្បីជាការលើកទឹកចិត្ត និងសម្រួលដល់ការបំពេញការងាររបស់កងការពារលេខ៦០១ លោកអភិបាលខេត្ត បានសន្យាឧបត្ថម្ភម៉ូតូចំនួន ១០គ្រឿង ដើម្បីប្រើប្រាស់ក្នុងការបំពេញភារកិច្ចផងដែរ។

លោកវរសេនីយ៍ឯក លន់ លុច្ស មេបញ្ជាការកងការពារព្រុំដែនលេខ៦០១ បានថ្លែងអំណរគុណអភិបាលខេត្តកណ្ដាល ដែលបានគិតគូរនិងយកចិត្តទុកដាក់ចំពោះកម្លាំងរបស់លោកផងដែរ៕

(សូមអានបន្ត)

សមាគមអតីតយុទ្ធជនកម្ពុជាខេត្តកំពង់ឆ្នាំង បានប្រគល់ផ្ទះចំនួន២ខ្នងជាអំណោយរបស់សម្តេចតេជោ ជូនសមាជិកសមាគមអតីតយុទ្ធជន២គ្រួសារ ក្នុងស្រុករលាប្អៀរ

(កំពង់ឆ្នាំ)ង៖ ផ្ទះចំនួន២ខ្នង ជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយយករដ្ឋមន្ត្រីនៃកម្ពុជា និងជាប្រធានសមាគមអតីតយុទ្ធជនកម្ពុជា បានប្រគល់ជូនអតីតយុទ្ធជន កម្ពុជាខេត្ត ក្រោមអធិបតីលោកស្រី កែ ច័ន្ទមុនី តំណាងរាសស្ត្រមណ្ឌលកំពង់ឆ្នាំង, លោក ឃូ សុផាន់ មេបញ្ជាការរងតំណាងឧត្តមសេនីយ៍ទោ ធន ធឿន ប្រធានសមាគមអតីតយុទ្ធជនកម្ពុជាខេត្ត, លោក ប្រធានមន្ទីរសង្គមកិច្ច ប្រធានការិយាល័យបេឡាជាតិខេត្ត លោកអភិបាលស្រុករលាប្អៀរ និងក្រុមការងារ ស អ ក ស្រុករលាប្អៀរ កងកម្លាំងប្រដាប់អាវុធ និងប្រជាពលរដ្ឋជាច្រើនរូប។

ក្រុមការងារបានចុះប្រគល់ផ្ទះចំនួន២ខ្នងជូន៖

*​ ទី១៖ លោក ញ៉េប រ៉ន ជានិវត្តជនរស់នៅភូមិត្រពាំងអំពិល ឃុំប្រស្និប ស្រុករលាប្អៀរ
* ទី២៖ លោក ស្រី ឈួយ ជាជនពិការរស់នៅភូមិក្តីត្នោត ឃុំស្រែថ្មី ស្រុករលាប្អៀរ។

លោកស្រី កែ ច័ន្ទមុនី បានថ្លែងថា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ប្រធានសមាគមអតីតយុទ្ធជនកម្ពុជា តែងតែយកចិត្តទុកដាក់ដល់សុខទុក្ខរបស់បងប្អូន អតីតយុទ្ធជនកម្ពុជាទូទាំងប្រទេស ដោយសារសម្តេចមានការងារក្នុងការដឹកនាំប្រទេសជាច្រើន ដូច្នេះសម្តេចមិនអាចអញ្ជើញចុះទៅបានសព្វគ្រប់ទីកន្លែងនោះទេ។

តែទោះជាសម្តេចមិនបានអញ្ជើញមកផ្ទាល់ សម្តេចក៏បានផ្តាំផ្ញើឲ្យអគ្គលេខាធិការ គន់ គីម ជាអនុប្រធានសមាគមអតីតយុទ្ធជនកម្ពុជា ជាសេនាធិការសម្រាប់មើលការខុសត្រូវដល់បងប្អូន អតីតយុទ្ធជនថា តើបងប្អូនមានសុខមានទុក្ខយ៉ាងដូចម្ដេចខ្លះ និងជួបការលំបាកអ្វីខ្លះ យើងត្រូវតែខិតខំជួយដោះស្រាយជូនពួកគាត់អោយបានទាន់ពេលវេលា ដោយសារតែគុណបំណាច់ ដែលបងប្អូនអតីតយុទ្ធជន ខិតខំកន្លងមកគឺជាការលះបង់ដើម្បីជាតិមាតុភូមិ នេះហើយ ទើបយើងមានសុខសន្តិភាពមកដល់ថ្ងៃនេះ។

គុណដ៏ធំធេងរបស់បងប្អូនអតីតយុទ្ធជនយើង ប្រជាពលរដ្ឋខ្មែរ ចងចាំជានិច្ចមិនអាចបំភ្លេចបានឡើយ តាមរយៈស្នាដៃដ៍ច្រើនរាប់មិនអស់នេះហើយ ក្នុងនោះក៏មានអ្នកទទួលបានមេដាយការពារជាតិ និងប័ណ្ណ បសស ឥស្សរយសទាំងអស់នេះ ជាលទ្ធផលដ៏មានតម្លៃដែលមិនអាចកាត់ថ្លៃបាន តែអ្វីដែលជាសំណាងរបស់យើងទាំងអស់គ្នានោះ គឺយើងមានថ្នាក់ដឹងនាំដ៏ល្អដូច សម្តេចតេជោ ហ៊ុន សែន ដែលសម្ដេចតែងតែបានលើកឡើងថា យើងពិបាកណាស់ទំរាំមានសន្តិភាពដូចសព្វថ្ងៃ គឺយើងត្រូវយកជីវិតទៅប្តូរដើម្បីប្រទេសជាតិ មាតុភូមិ សម្តេចបានហាមផ្តាច់ មិនឲ្យមានអតីតយុទ្ធជន រឺប្រជាពល រដ្ឋណាម្នាក់ត្រូវស្លាប់ដោយបញ្ហាអត់បាយនោះឡើយ។

ហេតុនេះទាក់ទងទៅនិងសុខទុក្ខរបស់បងប្អូនអតីតយុទ្ធជន និងប្រជាពលរដ្ឋយើង សូមផ្តល់តាមរយៈមេភូមិមេឃុំមេប៉ុស្តិ៍ ពិសេសតាមរយៈអាជ្ញាធរមូលដ្ឋានគ្រប់ថ្នាក់ ដែលជាភ្នែក ជាច្រមុះរបស់រាជរដ្ឋាភិបាល លោកស្រីសូមផ្តាំផ្ញើដល់បងប្អូនប្រជាពលរដ្ឋយើង សុំកុំភ្លេចការពារខ្លួន និងគ្រួសារ អោយជៀសផុតពីជំងឺកូវិដ-១៩ ព្រោះថាយើងអាចភ្លេចពីជំងឺកូវីដ-១៩ តែកូវីដ-១៩មិនភ្លេចយើងនោះទេ។

បញ្ចប់នៃការសំណេះសំណាល លោកស្រីតំណាងរាស្ត្រ បានប្រគល់ផ្ទះទាំងពីរខ្នង និងអំណោយជាសម្ភារៈ និងថវិកា ដល់គ្រួសារអតីតយុទ្ធជនទាំងពីរគ្រួសារខាងលើនេះ ដោយក្នុងមួយគ្រួសារៗ ទទួលបាន ថវិកា ១០០,០០០ ៛, អង្ករ ៣បេរ ,មី ១កេស ,ទឹកស៊ីវអ៉ីវ ៤យួរ ,ទឹកត្រី ៣យួរ , ត្រីខកំប៉ុង ៣យួរ ,ក្រម៉ា១, សារ៉ុង១ ,អាវប៉ាក់ស១ ,សម្ពត់ខ្មៅ១ និងទឹកសុទ្ធ ១កេស ក្នុងនោះគ្រួសារអតីតយុទ្ធជនចូលរួមចំនួន ៣០នាក់ ក្នុងម្នាក់ៗ ទទួលបាន អង្ករ ១០គីឡូក្រាម, ថវិកា ១០,០០០ ៛ ,មី៥កញ្ចប់,ទឹកស៊ីអ៊ីវ ១ដប,ទឹកត្រី១ដប និងត្រីខ១កំប៉ុង ។ ប្រជាការពារ និងប្រជាពលរដ្ឋ ចំនួន២០នាក់ក្នុងម្នាក់ទទួលបានថវិកា ១០,០០០រៀលផងដរ៕

(សូមអានបន្ត)

ស្អែកនេះ! ក្រុមការងារចម្រុះចុះដកហូតដីឡូតិ៍លោកស្រី ឆៃ ចាន់រិទ្ធី សូនីតា មកប្រគល់ជូនពលរដ្ឋមានប័ណ្ណកម្មសិទ្ធិ តាមការណែនាំពីលោក ឃួង ស្រេង

(ភ្នំពេញ)៖ នៅព្រឹកថ្ងៃទី១០ ខែកក្កដា ឆ្នាំ២០២០ ស្អែកនេះ គឺជាឱសានវាទមួយ ដែលក្រុមការងារចំរុះរដ្ឋបាលខណ្ឌឫស្សីកែវ និងចុះអនុវត្តវិធានការក្ដៅ ក្នុងការរុះរើសំណង់ ក៏ដូចជាសម្ភារផ្សេងៗ និងអាចឈានដល់ការដកហូតយកដីឡូតិ៍មួយកន្លែងរបស់លោកស្រី ឆៃ ចាន់រិទ្ធី សូនីតា ដើម្បីប្រគល់ជូនប្រជាពលរដ្ឋ ដែលមានប័ណ្ណកម្មសិទ្ធិស្របច្បាប់ តាមសេចក្ដីណែនាំក្នុងកិច្ចប្រជុំ កាលពីថ្ងៃទី០១ ខែកក្កដា ឆ្នាំ២០២០ របស់លោក ឃួង ស្រេង អភិបាលរាជធានីភ្នំពេញ។

នេះបើតាមការលើកឡើងរបស់ លោក ប្រាជ្ញ សីហា អភិបាលរងខណ្ឌ ដោយមានការចូលរួមពីលោក ស៊ូ សោគន្ធ, លោក លីន ញ៉ក់ អភិបាលរងខណ្ឌ២រូបផ្សេងទៀត តំណាងលោក ជា ពិសី អភិបាលខណ្ឌ និងជាសមាជិកក្រុមលេខាសម្ដេចតេជោ ហ៊ុន សែន នាយករដ្ឋមន្ត្រីកម្ពុជា នៅក្នុងកិច្ចប្រជុំដ៏បន្ទាន់មួយ នៅសាលាខណ្ឌឫស្សីកែវ នារសៀលថ្ងៃទី០៩ ខែកក្កដា ឆ្នាំ២០២០នេះ។

ក្នុងកិច្ចប្រជុំបន្ទាន់នេះ លោក ប្រាជ្ញ សីហា បានគូសបញ្ជាក់ថា ព្រឹកស្អែកនេះគឺជាឱសានវាទ ដែលក្រុមការងារចំរុះរដ្ឋបាលខណ្ឌឫស្សីកែវ នឹងចុះអនុវត្តវិធានការ ក្នុងការរុះរើសំណង់ ក៏ដូចជាសម្ភារផ្សេងៗ និងអាចឈានដល់ការដកហូតយកដីឡូត៌មួយកន្លែង របស់លោកស្រី ឆៃ ចាន់រិទ្ធី សូនីតា ស្ថិតនៅត្រង់ចំណុចដីឡូត៌លេខ៥១ ផ្លូវលេខ១៨-១២ កែងផ្លូវលេខ១៧-២៩ ពោលគឺស្ថិតក្នុងតំបន់អភិវឌ្ឍន៍ឫស្សីកែវ ភូមិទួលពពែ សង្កាត់ទួលសង្កែទី២ ដើម្បីប្រគល់ជូនប្រជាពលរដ្ឋ ដែលមានប័ណ្ណកម្មសិទ្ធិស្របច្បាប់ តាមសេចក្ដីណែនាំក្នុងកិច្ចប្រជុំមួយ កាលពីថ្ងៃទី០១ ខែកក្កដា ឆ្នាំ២០២០ របស់លោក ឃួង ស្រេង អភិបាលរាជធានីភ្នំពេញ។

លោកអភិបាលរងខណ្ឌ ប្រាជ្ញ សីហា បានគូសបញ្ជាក់ទៀតថា ការត្រៀមលក្ខណៈរួចជាស្រេចសម្រាប់កម្លាំងចំរុះរដ្ឋបាលខណ្ឌ ដើម្បីចុះអនុវត្តវិធានការដ្ឋបាល ក្នុងការរុះរើសំណង់ ក៏ដូចជាសម្ភារផ្សេងៗ និងអាចឈានដល់ការដកហូតយកដីឡូត៌មួយកន្លែងនេះ គឺអនុវត្តឡើង ក្រោយពីម្ចាស់ទីតាំងលោកស្រី ឆៃ ចាន់រិទ្ធី សូនីតា បានឯកភាពជាមួយរដ្ឋបាលសង្កាត់-ខណ្ឌ ក៏ដូចជារដ្ឋបាលរាជធានីភ្នំពេញ ថានឹងរុះរើចេញដោយខ្លួនឯងក្នុងរយៈពេល៨ថ្ងៃក្រោយ តែមកទល់ថ្ងៃទី០៩ ខែកក្កដា ឆ្នាំ២០២០នេះ ម្ចាស់ទីតាំងនៅតែរឹងរូសមិនព្រមអនុវតតាមការស្នើសុំឡើយ៕

(សូមអានបន្ត)